Is u 'n SA-burger wat tans in die buiteland is, maar graag aan 2009 se nasionale verkiesing wil deelneem? Kliek hier om ons petisie oor stemreg te teken.

1. Wat is die Kom Huistoe-Veldtog?

Die Kom Huistoe-Veldtog is 'n projek van die burgerlike inisiatief AfriForum wat daarop gerig is om 'n positiewe bydrae tot die bereiking van die volgende drie doelwitte te lewer:

• Om soveel kundiges as moontlik wat Suid-Afrika reeds verlaat het, te help om suksesvol terug te keer;
• Om soveel kundiges as moontlik wat oorweeg om Suid-Afrika te verlaat, aan te spoor om te bly en plaaslik betrokke te raak;
• Om kundiges wat steeds in Suid-Afrika bly, maar "na binne geëmigreer" en onttrek het, plaaslik te betrek.

2. Wie is betrokke by die Kom Huistoe-Veldtog?

Die Kom Huistoe-Veldtog is daarop gerig om samewerking tussen 'n wye reeks rolspelers te bewerkstellig en uit te bou ter bereiking van die veldtog se doelwitte. Hierdie rolspelers wat betrek word, sluit nie-regeringsorganisasies, besighede en staatsdepartemente in.

Die veldtog is in 2003 gesamentlik deur die vakbondbeweging Solidariteit en die nie-winsgewende diensorganisasie, Maatskappy vir Immigrasie geloods. Sedert 2006 word dit deur AfriForum, die burgerlike inisiatief van Solidariteit, bedryf.

Lidmaatskap van AfriForum of Solidariteit is nie 'n voorvereiste om by die veldtog betrokke te raak of advies daarvan aan te vra nie.

3. Waarom is die Kom Huistoe-Veldtog geloods?

Suid-Afrika is tans in die posisie dat meer kundiges die land verlaat as wat dit binnekom. Dit kom dus neer op wat in Engels 'n "brain drain" genoem word. Na raming is daar reeds meer as 'n miljoen Suid-Afrikaners wat in die buiteland woon.

'n Ontwikkelende land soos Suid-Afrika kan nie bekostig om kundiges uit die ekonomie te verloor nie. Hierdie feit word beklemtoon deur die bevinding in ABSA se jongste langtermyn-ekonomiese vooruitskatting, naamlik dat die verlies van kundigheid dit vir die Suid-Afrikaanse ekonomie bitter moeilik sal maak om bevredigend te groei. Drastiese stappe is nodig om die kundigheidsvlakke te verhoog. Die terugbring, behoud en betrekking van Suid-Afrikaanse kundiges is van kardinale belang vir die Suid-Afrikaanse ekonomie en die Kom Huistoe-Veldtog is uit hierdie noodsaak gebore.

4. Waarop fokus die Kom Huistoe-Veldtog se plan?

Ter bereiking van die Kom Huistoe-Veldtog se doelwitte is 'n driebeenplan opgestel. Met hierdie plan word gepoog om 'n positiewe bydrae rakende elk van die bene van die plan te lewer, naamlik:

• Die bedryf van 'n Bystand- en Adviesburo wat die kundiges wat die land verlaat het en graag wil terugkeer, in die proses by te staan;
• Die skep van gunstiger omstandighede deur AfriForum in Suid-Afrika wat sal meebring dat kundiges graag in die land sal wil woon; en
• Die uitwys van wanpersepsies oor die lewe in die buiteland.

Om voortdurende sukses met bogenoemde plan te behaal, voer AfriForum deurlopend gesprekke met nie-regeringsorganisasies, sake-ondernemings en staatsdepartemente om hulle samewerking te bekom, te behou en uit te bou.